Սեպտեմբերին պարզ կդառնա, թե 2018 թվականին Հայաստանում որ քաղաքն է ճանաչվում երիտասարդական մայրաքաղաք: Երիտասարդական մայրաքաղաքի կոչման համար պայքարում են երեք թեկնածու քաղաքներ` Ջերմուկը, Իջեւանը եւ Գավառը: ՀՀ սպորտի և երիտասարդության հարցերի նախարարի տեղակալ Արսեն Քարամյանը «Արմենպրես»–ի հետ զրույցում նշեց, որ ընտրությունը կատարվում է երկու բաղադրիչով:
«Մեկ բաղադրիչը sms-քվեարկությունն է, որը ներկայում անցկացվում է և կշարունակվի մինչև օգոստոսի վերջը: Երկրորդ բաղադրիչն անկախ փորձագետների գնահատականներն են: Փորձագետները եղել են քաղաքներում, տեղում ծանոթացել դրանց հնարավորություններին, ծրագրերին: Կազմկոմիտեն, դիտարկելով sms-քվեարկության արդյունքները, փորձագիտական գնահատականները, կորոշի, թե որ քաղաքն է 2018-ի համար ճանաչվում երիտասարդական մայրաքաղաք»,-ասաց Արսեն Քարամյանը:
Մրցույթի նպատակն է խթանել Հայաստանի մարզերի համաչափ զարգացումը, խրախուսել քաղաքային իշխանություններին՝ տեղական մակարդակում մշակելու երիտասարդական քաղաքականության իրականացման արդիական և արդյունավետ մոդել, նպաստել մարզերում երիտասարդական կազմակերպությունների և ենթակառույցների զարգացմանը:
«Երիտասարդական մայրաքաղաք» կոչմանն արժանացած քաղաքում անցկացվում են բազմաթիվ ներհանրապետական և միջազգային միջոցառումներ: Արսեն Քարամյանի խոսքով՝ դա ոչ միայն տնտեսական ակտիվությանն է նպաստում՝ ենթակառուցվածքներ, հյուրանոցներ, սննդի օբյեկտներ և այլն, այլև տեղի երիտասարդների համար հագեցած օրակարգ է մշակվում:
«Երիտասարդական մայրաքաղաք» մրցույթի գաղափարն ի հայտ է եկել 2012 թվականին, որը գործնական փուլ է մտել 2013-ին: Մինչ այժմ երիտասարդական մայրաքաղաքներ են ճանաչվել Սիսիանը, Ստեփանավանը, Գյումրին, Չարենցավանը: |